यशवंतराव चव्हाण सेंटरच्या वतीने ‘यशवंतराव चव्हाण ज्येष्ठ नागरिक पुरस्कार आणि यशवंतराव चव्हाण ज्येष्ठ नागरिक संघ/संस्था पुरस्कारांची’ घोषणा करण्यात आली. एकूण चार ज्येष्ठ नागरिक आणि एक ज्येष्ठ नागरिक संघाची या पुरस्कारासाठी निवड करण्यात आली आहे. पुरस्काराचे हे पहिलेच वर्ष आहे.
रत्नागिरी येथील रेखा रवींद्र बागुल, कल्याण येथील मीनल मतीमनोहर ठाकोर, रत्नागिरी येथील डॉ. श्रीरंग कद्रेकर, नवी मुंबई येथील अण्णासाहेब टेकाळे यांना यशवंतराव चव्हाण ज्येष्ठ नागरिक पुरस्कार जाहीर करण्यात आला आहे. तसेच ठाणे येथील ज्येष्ठ नागरिक संस्था वासिंद व परिसर यांना यशवंतराव चव्हाण ज्येष्ठ नागरिक संघ/संस्था पुरस्कार जाहीर करण्यात आला आहे.
सेवानिवृत्त झाल्यानंतर, आपल्या अनुभवाच्या जोरावर समाजाभिमुख कार्य करणारे अनेक ज्येष्ठ नागरिक आहेत; त्याचबरोबर ज्येष्ठ नागरिक संघ देखील आहेत. जे कोणत्याही स्वार्थाशिवाय कार्य करीत आहेत. त्यांचा यथोचित मान सन्मान व्हावा हा या पुरस्काराचा उद्देश आहे.
पुरस्काराचे स्वरूप रोख रक्कम, सन्मान चिन्ह आणि मानपत्र असे आहे. चव्हाण सेंटर, मुंबई येथे ८ ऑक्टोबर २०२३ रोजी हा पुरस्कार वितरण सोहळा रंगणार आहे.