- Awards Content:
- वर्ष: 2025, पुरस्कार प्रकार: राज्यस्तरीय पुरस्कार
अरुण रोडे हे अहमदनगर डिस्ट्रिक्ट सेन्ट्रल को-ऑपरेटिव्ह बँकेत ४० वर्षे विविध पदांवर सेवा देऊन निवृत्त झाले. त्यानंतर २००४ पासून पुण्यातील ६ बँकिंग को-ऑपरेटिव्ह ट्रेनिंग कॉलेजेसमध्ये लेक्चरर म्हणून ते कार्यरत आहेत.
फेस्कॉम या संस्थेवर त्यांनी विविध पदांवर योगदान दिले आहे. ज्येष्ठ नागरिकांसाठी केंद्र आणि राज्य सरकारच्या धोरणांवर, आर्थिक योजनांवर आणि उपयुक्त कायद्यांवर ४१ पुस्तकांची त्यांनी निर्मिती केली आहे. नेरूळ, नवी मुंबई मुख्यालय आणि प्रादेशिक स्तरावर गावोगावी कार्यकर्ते तयार करण्यासाठी १०० हून अधिक प्रशिक्षण वर्ग आयोजित केले. सर्व प्रादेशिक विभागांत मोफत कायदेविषयक सल्ला केंद्रे स्थापन करण्यात त्यांचा मोलाचा वाटा आहे. आई-वडील आणि ज्येष्ठ नागरिक चरितार्थ व कल्याण कायदा २००७ अंतर्गत पीडित, वंचित, शोषित ज्येष्ठांना न्याय मिळवून देण्यासाठी त्यांनी प्रयत्न केले आहेत. २०१५ पासून मंत्रालयातील ज्येष्ठ नागरिक सहाय्यता कृती समितीचे प्रतिनिधी म्हणून कार्यरत आहेत. पुण्यातील सर्व ज्येष्ठ नागरिक संघटनांमध्ये ते सक्रिय आहेत.
२०२० पासून यशदा येथील डीटीडीसीमध्ये राज्य कर्मचाऱ्यांच्या प्रशिक्षण वर्गात लेक्चरर म्हणून कार्यरत आहेत. पुण्यातील कुसुमाग्रज कट्ट्यावर उपाध्यक्ष म्हणून ज्ञानपीठ पुरस्कार विजेते कवी वि. वा. शिरवाडकर यांचे साहित्य जनमानसात पोहोचवण्याचे काम करतात. ७५ साहित्यिक सदस्यांसह विविध उपक्रम ते राबवतात. गेल्या १० वर्षांपासून "प्रादेशिक वार्तापत्र पुणे"चे अरुण रोडे हे संपादक आहेत. "चांदण्यांची अक्षरे", "गगनगंध", "सोनं कवडसे", "चंद्रझुला" हे कवितासंग्रह यासह अनेक पुस्तके प्रकाशित आहेत. विविध मासिकांमधून, स्मरणिकांमधून ज्येष्ठ नागरिक चळवळीवर १०० हून अधिक लेख प्रकाशित झाले आहेत.
अरुण रोडे यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक राज्यस्तरीय कृतज्ञता सन्मान” देताना आम्हाला अतिशय आनंद होत आहे.
- Awards Content:
- वर्ष: 2025, पुरस्कार प्रकार: राज्यस्तरीय पुरस्कार
महाराष्ट्र जीवन प्राधिकरणमध्ये रमेश दुसे यांनी ३३ वर्षे यशस्वी सेवा केली आणि २००१ साली उपअभियंता पदावरून ते सेवानिवृत्त झाले. सेवानिवृत्तीनंतर त्यांनी स्वत:ला सामाजिक सेवेत झोकून दिले. डॉ. हेडगेवार रुग्णालयात ४ वर्षे सेवाव्रती म्हणून त्यांनी कार्य केले. बौद्धिक असक्षम, आत्मकेंद्रित, बहुविकलांग पाल्यांच्या पालकांसाठी नवजीवन पालक संघाची स्थापना केली. २००७ साली, ४०० प्रतिनिधींचा सहभाग असणारी अखिल भारतीय पालक परिषद भरवली. या परिषदेचा भरपूर फायदा उपस्थित पालकांना झाला.
२०१२ साली बौद्धिक असक्षम मुलांसाठी डे केअर सेंटर आणि २०१३-२०१५ पर्यंत निवासी वसतीगृह त्यांनी चालवले. पालकांसाठी तीन बचत गट चालू केले. विविध विषयांवर व्याख्याने आयोजित केली. या व्याख्यानाचा दिव्यांगांच्या पालकांमध्ये जागृती निर्माण करण्यासाठी खूप उपयोग झाला. २००७ पासून त्यांनी "पाल्य स्नेह मुखपत्र"चे संपादकत्व स्वीकारले आहे. ते आजतागायत चालू आहे. आजच्या घडीला पालकांमध्ये त्या मुखपत्राची लोकप्रियता खूप वाढली आहे. ज्येष्ठांसाठी प्रगतिशील ज्येष्ठ नागरिक सेवाभावी संस्थेत २०१० साली गटप्रमुख म्हणून त्यांनी प्रवेश केला.२०१४ ते २०१६ सचिव, २०१६ ते २०१८ अध्यक्ष म्हणून त्यांनी पदे भूषवली. रमेश दुसे यांच्या प्रयत्नातून त्यांच्या ज्येष्ठ नागरिक संघास राम नाईक यांच्या हस्ते ILC-1 पुणे पुरस्कार मिळाला आहे. यासह अनेक पुरस्कार मिळाले आहेत.
ह्या समाजसेवेबरोबरच त्यांनी साहित्य क्षेत्रातही प्रगतीचे शिखर गाठले आहे. आजपर्यंत अनेक वृत्तपत्रातून, मासिकातून बौद्धिक असक्षम मुलांच्या पालकांमध्ये जागृतीसाठी व ज्येष्ठांसाठी त्यांनी भरपूर लिखाण केले आहे. आजपर्यंत दिव्य मराठी, महाराष्ट्र टाईम्स, लोकमत, सकाळ या वृत्तपत्रांमधून १५० लेख, ७० कविता प्रकाशित झाल्या आहेत.
रमेश दुसे यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक राज्यस्तरीय कृतज्ञता सन्मान” देताना आम्हाला अतिशय आनंद होत आहे.
- Awards Content:
- वर्ष: 2025, पुरस्कार प्रकार: राज्यस्तरीय पुरस्कार
प्राध्यापक म्हणून निवृत्त झाल्यानंतर सामाजिक कार्याची आवड असल्याने २००५ मध्ये कोल्हापूरमधील शाहू ज्येष्ठ नागरिक संघाशी सुशीला ओडेयर जोडल्या गेल्या.
या संघात महिलांचा सहभाग अत्यल्प असल्याने २०१० मध्ये सावित्रीबाई फुले महिला संघ स्थापन करण्यात त्यांनी पुढाकार घेतला. पहिले तीन वर्षे त्यांनी सचिव म्हणून काम केले त्यानंतर, नऊ वर्षे त्यांनी अध्यक्ष म्हणून काम पाहिले.
या संघामार्फत सदस्यांना घरी वाढदिवसाचे शुभेच्छा पत्र पाठविण्यास त्यांनी सुरू केले, परिणामी घरीच वाढदिवस अपेक्षितपणे साजरे होऊ लागले. ज्येष्ठांच्या आनंदात भर पडू लागली. संघातील महिला सदस्यांमध्ये स्टेजवर येऊन बोलण्याचे धाडस नव्हते. आजच्या घडीला सदस्य दोन-तीन मिनिटे सहजपणे धाडसाने बोलतात. त्यांचा आत्मविश्वास वाढला आहे. कला गुणांना वाव देण्यासाठी २०१८ मध्ये कोल्हापूरातील ज्येष्ठ महिलांसाठी आनंद मेळावा आयोजित केला गेला त्यासाठी अडीचशे महिलांचा सहभाग होता. संघात महिला संख्येत वाढ झाल्याने विविध उपक्रम हाती घेतले गेले. ढासळत्या कुटुंब व्यवस्थेवर "चला कुटुंब वाचवूया" हा शोध प्रकल्प हाती घेतला. संघातील निरक्षर महिलांना सही करण्यास त्यांनी शिकवले.
ग्रामीण भागात जाऊन त्यांनी व्याख्यानांद्वारे महिला जागृती केली. २०१० पासून फेस्कॉमशी त्या जोडल्या आहेत. ॲक्युप्रेशर, योग आणि आनंदाने जगणे यावर व्याख्याने व प्रबोधनपर कार्यक्रम त्यांनी केले.
आजपर्यंत राज्यस्तरीय व राष्ट्रीय इतिहास परिषदांमध्ये सुशीला यांनी मराठ्यांवर इंग्रजी शोधनिबंध प्रकाशित केला आहे. सत्यशोधक विठ्ठल बिराजी डोणे समग्र वाड्मय, श्री मौनी विध्यापीठ, स्वातंत्र्य लढ्यातील विरांगना अशी त्यांची एकुण आठ पुस्तके प्रकाशित झाली आहेत. आकाशवाणी आणि वृत्तपत्रांमध्ये त्यांनी विविध विषयावर जनजागृती केली आहे. त्यांच्या एकुणात कार्याची दखल घेऊन अनेक पुरस्कारांनी सन्मानित करण्यात आले.
सुशीला ओडेयर यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक राज्यस्तरीय कृतज्ञता सन्मान’ देताना आम्हाला अतिशय आनंद होत आहे.
- Awards Content:
- वर्ष: 2025, पुरस्कार प्रकार: राज्यस्तरीय पुरस्कार
२००९ पासून ज्येष्ठ नागरिकांच्या कल्याणासाठी चेलनादेवी फेसकॉमच्या प्रादेशिक विभागात सक्रीयरीत्या कार्य्ररत आहेत. सांगली जिल्ह्यात १३० ज्येष्ठ नागरिक संघांची त्यांनी स्थापना केली असुन, त्यातील ४७ महिला संघ आहेत. ज्येष्ठ महिलांमध्ये जनजागृती करण्यासाठी प्रत्येक संघाला भेटी देऊन त्यांनी विविध प्रकारे ज्येष्ठांचे प्रबोधन केले आहे. ज्येष्ठ नागरिक कायद्याची ज्येष्ठांना माहीती व्हावी यासाठी विधी साक्षरतेचे उपक्रम त्यांनी राबवले आहेत. ज्येष्ठांसाठीच्या शासकीय योजनांची आणि आरोग्यविषयक योजनांची माहिती त्यांना मिळावी यासाठी चेलनादेवी यांनी अनेक कार्यशाळांचे आयोजन सांगली जिल्ह्यात केले आहे. शेकडो महिला आणि पुरुषानी यात सहभाग नोंदवला आहे. सांगली जिल्ह्यातील ज्येष्ठांसाठी त्या दरवर्षी "मनोहारी मनोयुवा" मेळावा आयोजित करतात. ज्येष्ठांच्या मानसिक किंवा शारीरिक छळाला प्रतिबंध घालण्यासाठी उपाय शोधण्याचा त्यांचा पुढील संकल्प आहे.
सकाळ दैनिकातील मुक्तपीठ सदरात त्यांनी नियमितपणे लिखाण केले आहे. चेलनादेवी यांनी लिहिलेल्या "संवाद" पुस्तकाचे प्रकाशन डॉ. तारा भवाळकर यांच्या हस्ते झाले आहे. सांगली जिल्ह्यात प्लास्टिक मुक्ती अभियान सुरू करून पर्यावरण जागृतीचे काम त्यांनी केले आहे. सांगली येथील बाल सुधार गृहात प्रबोधनपर विविध कार्यक्रम घेऊन बालकांसाठी महत्वाचे कार्य त्या करत आहेत.
चेलनादेवी खुरपे यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक राज्यस्तरीय कृतज्ञता सन्मान’ देताना आम्हाला अतिशय आनंद होत आहे.
- Awards Content:
- वर्ष: 2025, पुरस्कार प्रकार: राज्यस्तरीय पुरस्कार
चंद्रपूर महाऔष्णिक विज केंद्रात नोकरी करताना जशी सवड मिळेल तसे त्यांनी समाजकार्य करीत राहिले. जशा सुट्ट्या मिळेल तशा आवडीने यथायोग्य सेवा कार्य त्यांनी केले. पुढे सोमनाथ येथील कर्मयोगी बाबा आमटे यांच्या ‘माझे श्रम संस्कार’ या छावणी शिबिरात ते सहभागी झाले व त्या काडाक्याच्या उन्हाळ्यात सकाळी श्रमदान व दुपारी बौध्दिक खाद्य मिळत असे. आंतरराष्ट्रीय किर्तीचे सुब्बाराव, लेखक पत्रकार यदूनाथ थत्ते, राम शेवाळकर, प्राचार्य डॉ. सोमनाथजी रोडे या सर्वांच्या मार्गदर्शनामुळे खऱ्या अर्थाने त्यांच्यात समाजभान बिजांकुर रूजले व त्यांनी समाज कार्याची वाट पकडली.
श्रीराम यांच्या पुढाकारातून ‘रक्त सहयोग चळवळ’ राबविली जाते.आजवर त्यांच्यामुळे शेकडो गरजू रुग्णांना त्यांच्या मित्र परिवाराला वेळोवेळी रक्ताची मदत मिळाली आहे. श्रीराम हे स्वतः उजवा पोलीओ ग्रस्त असल्यामुळे दिव्यांगाच्या यातना समस्या व आनंदवन प्रयोगवनाची प्रेरणा यामुळे आजवर लोक सहभागातून त्यांनी शेकडो दिव्यांगांना सायकली व इतर उद्योजकीय सहाय्य उपलब्ध करून दिलेले आहे.
त्यांचे लग्न झाल्यावर त्यांनी ‘एक दाम्पत्य, एक अपत्य’ असा संकल्प केला आणि कृतीतून पूर्णत्वास नेला. त्या नंतर त्यांनी १९९० रोजी एका मुलाला दत्तक घेतले. आज तो बी.ए. एम.एल.एस मास्टर इन लेबर स्टडीज आहे. तसेच नागपूरच्या मातृ सेवा संघ, लता मंगेशकर मेडीकल कॉलेज, कामठी चे विवेकानंद अनाथालय तसेच चंद्रपूरच्या किलबिल संस्थेतुन इतर निपुत्रीकांना दत्तक घेण्यासाठी प्रवृत्त केलेले आहे.
मरणोत्तर देहदान, अवयवदान संकल्प त्यांनी केला आहे. यातून राष्ट्रीय कर्ज उत्तरदायीत्व निभावल्याचे समाधान मिळेल, अशी त्यांची भावना आहे.
श्रीराम पान्हेरकर यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक राज्यस्तरीय कृतज्ञता सन्मान’ देताना आम्हाला अतिशय आनंद होत आहे.
