• Senior citizens Association / Organization

• Awards Content:
  • वर्ष: 2026, पुरस्कार प्रकार: राज्यस्तरीय पुरस्कार

आयुष्याच्या उत्तरार्धात ज्येष्ठांना आधार, सन्मान आणि जगण्याचा नवा आनंद देणारे एक हक्काचे व्यासपीठ… म्हणजेच ‘ज्येष्ठ नागरिक संघ, चोपडा’!

१४ जानेवारी १९९२ रोजी मकरसंक्रांतीचे औचित्य साधून या संघाची स्थापना झाली. स्वातंत्र्यसैनिक, माजी आमदार कै. माधवराव गोटू पाटील यांच्या प्रेरणेतून आणि तत्कालीन नगराध्यक्ष कै. सीताराम नारायण अग्रवाल, स्वातंत्र्यसैनिक कै. मोतीलालजी गुजराथी, कै. व्ही.के. पाटील आणि कै. विठ्ठल निंबाजी बडगुजर यांच्या दूरदृष्टीतून या सेवाभावी प्रवासाची मुहूर्तमेढ रोवली गेली. कै. सीताराम नारायण अग्रवाल यांनी संघाचे पहिले अध्यक्ष म्हणून धुरा सांभाळली.

विधी व न्याय, शिक्षण, आरोग्य, कला-क्रीडा, विज्ञान आणि पर्यावरणासह विविध क्षेत्रांत संघाने अविरत कार्याचा ठसा उमटवला आहे. पर्यावरणपूरक हवेशीर परिसर, समृद्ध वाचनालय, विरंगुळा केंद्र आणि ज्येष्ठांसाठी उपयुक्त व्यायामशाळा यांमुळे हे केंद्र ज्येष्ठांचे दुसरे घर बनले आहे.

नियमित आरोग्य शिबिरे, निसर्ग सहली, आनंदमेळावे, वृक्षारोपण आणि स्वच्छता मोहिमा यांसारख्या वैविध्यपूर्ण उपक्रमांनी इथल्या ज्येष्ठांचे जीवन चैतन्यमय केले आहे. केवळ उपक्रमच नव्हे, तर ज्येष्ठांच्या व्यक्तिगत अडचणींवर थेट संवाद, कायदेशीर सल्ला मार्गदर्शन आणि वाढदिवस साजरे करून संघाने कौटुंबिक जिव्हाळा जपला आहे. धर्मनिरपेक्षता आणि राष्ट्राभिमानाचे संस्कार जपत संघ सदैव कार्यमग्न आहे. जळगाव जिल्ह्यातील प्रथम क्रमांकाचा संघ, खानदेश प्रादेशिक विभागातील सर्वोत्तम संघ आणि अतिउत्कृष्ट ग्रामीण संघ अशा अनेक सन्मानांनी या कार्याची पावती दिली आहे.

परिसरातील ज्येष्ठांच्या जीवनात सुरक्षितता, सहकार्य आणि स्वाभिमानाची ऊर्जा निर्माण करणाऱ्या ‘ज्येष्ठ नागरिक संघ, चोपडा’ यांना यशवंतराव चव्हाण ज्येष्ठ नागरिक संघ राज्यस्तरीय कृतज्ञता सन्मान देताना अतिशय आनंद होत आहे.

• Senior citizens Association / Organization

• Awards Content:
  • वर्ष: 2023, पुरस्कार प्रकार: राज्यस्तरीय पुरस्कार

छत्रपती शिवाजी महाराजांच्या पदस्पर्शाने पावन झालेल्या माहुली किल्ला परिसरातील २०-२५ खेड्यातील ज्येष्ठांनी एकत्र येऊन १ ऑक्टोबर २०११ रोजी ज्येष्ठ नागरिक संघ स्थापन केला. त्याचं नाव "ज्येष्ठ नागरिक संस्था वासिंद व परिसर – ठाणे" ! आजच्या घडीला जवळपास ८८७ आजीव सभासद आहेत. आणि अधोरेखित करावी अशी गोष्ट म्हणजे ५९० महिला सदस्य आहेत. वेळोवेळी मासिक सभा घेऊन ज्येष्ठांसाठी विविध कार्यक्रमांचे आयोजन करण्यात येते.

आनंद मेळावा, महिला मेळावा, आरोग्य मेळावा सातत्याने राबविण्याचा त्यांचा संकल्प असतो. ज्येष्ठांच्या मनोरंजनासाठी विविध सहलींचे आयोजन केले जाते. गेल्या पाच वर्षात एकूण २० सहली निघाल्या असून त्यात ज्येष्ठांनी भरपूर आनंद लुटला आहे.

जागतिक ज्येष्ठ नागरीक दिनाचे औचित्य साधून शहरातून जनजागृतीपर प्रभातफेरी काढली जाते तसेच सामाजिक बांधिलकी शपथ घेतली जाते. तसेच मानसिक व शारीरिक आरोग्य व्याख्यानमालेचे आयोजन केले जाते. ज्येष्ठांच्या स्मरणशक्ती वाढीसाठी विविध खेळांचे आयोजन देखील केले जाते.

"जीवन सुंदर आहे - जगा आणि जगवा" या ध्येयवाक्यावर त्यांचा हा प्रवास असाच अखंड चालू राहो, या सदिच्छा.

आपणास यशवंतराव चव्हाण सेंटरचा "यशवंतराव चव्हाण ज्येष्ठ नागरिक संघ पुरस्कार" देताना आम्हाला अत्यंत आनंद होत आहे.

• Senior citizens Association / Organization

• Awards Content:
  • वर्ष: 2024, पुरस्कार प्रकार: राज्यस्तरीय पुरस्कार

जळगावमधील ज्येष्ठ नागरिकांसाठी एक आशेचा किरण म्हणजे चैतन्यनगर, ज्येष्ठ नागरिक संघ ! ज्येष्ठांची काळजी घेण्यासाठी हा संघ आघाडीवर आहे. शून्यातून सुरवात झालेल्या या संघाची सभासद संख्या आता १६८ वर पोहोचली आहे. प्रेम, काळजी आणि मायेने वाढणारे हे एक छोटेसे कुटुंबच !

प्रत्येक महिन्याच्या शेवटी वाढदिवस असलेल्या सभासदांचा सत्कार, राष्ट्रीय योग दिनानिमीत्त योग प्रशिक्षण शिबीर, बॉडी चेक-अप शिबीर तसेच उत्तर महाराष्ट्र वि‌द्यापीठातर्फे जेष्ठांसाठी समुपदेशन कार्यशाळेचे देखील आयोजन या ज्येष्ठ नागरिक संघामार्फत केले जाते.

सण, परंपरा जोपासण्यात हा संघ आघाडीवर आहे. गुढीपाडवा, दिवाळी अशा सणांच्या दिवशी विविध सांस्कृतिक कार्यक्रमाचे आयोजन केले जाते. जेणेकरून सर्व ज्येष्ठ मंडळींचा आनंदात विरंगुळा व्हावा. ज्येष्ठ महिलांसाठी हळदी कुंकू कार्यक्रम देखील घेतला जातो.

दयाळूपणा, संस्कृती आणि काळजी या त्रिसूत्रीवर हा ज्येष्ठ नागरिक संघ उभा आहे. म्हातारपणातील सुवर्ण वर्षांसाठी हा संघ एक आधारस्तंभ आहे. अनेक ज्येष्ठांचा सोबती हा संघ आहे, अनेक ज्येष्ठांचा खांदा हा संघ आहे. अजून अनेकांना आधार देणे बाकी आहे. त्यामुळे या ज्येष्ठ नागरिक संघाच्या माध्यमातून उत्तरोतर अनेक सामाजिक काम घडो, या सदिच्छा !

चैतन्यनगर, ज्येष्ठ नागरिक संघ, जळगाव यांना यशवंतराव चव्हाण ज्येष्ठ नागरिक संघ राज्यस्तरीय कृतज्ञता सन्मान देताना आम्हाला अतिशय आनंद होत आहे.