काही संस्था माणसांमुळे मोठ्या होतात... तर काही माणसे संस्थेमुळे मोठी होतात. परंतु, एका ध्येयवेड्या व्यक्तीच्या निस्वार्थ समर्पणातून उभी राहिलेली आणि आज हजारो जीवांचे आयुष्य समृद्ध करणारी संस्था म्हणजे — जनसेवा फाउंडेशन, पुणे!

संस्थेचे संस्थापक-अध्यक्ष डॉ. विनोद जी. शहा यांच्या दूरदृष्टीतून १५ जानेवारी १९८८ रोजी जनसेवा फाउंडेशनचे सेवाबीज रोवले गेले. राष्ट्रीय आणि आंतरराष्ट्रीय पातळीवरील नामांकित संस्थांशी जोडलेल्या नात्यामुळे, जागतिक दर्जाचा अनुभव आणि नवनवीन लोककल्याणकारी उपक्रम संस्थेच्या कार्यात रुजत गेले. आज सुमारे ५ एकरांच्या विस्तीर्ण परिसरात दिमाखात उभी असलेली जनसेवा फाउंडेशनची ही वास्तू केवळ एक इमारत नसून हजारो निराधार जीवांचे माहेरघर आहे. येथे चालणारा वृद्धाश्रम, अद्ययावत रुग्णालय, विरंगुळा केंद्र, सेंच्युरी क्लब, नर्सिंग स्कूल आणि इतर अनेक समाजोपयोगी उपक्रम अहोरात्र कार्यरत आहेत.

इथल्या वृद्धाश्रमात २०० हून अधिक ज्येष्ठ नागरिक आत्मसन्मानाने जगत आहेत; त्यापैकी तब्बल १६० ज्येष्ठांची संपूर्ण सेवा अगदी विनामूल्य केली जाते. केवळ निवाराच नव्हे, तर योग, भगवद्गीता वर्ग, निसर्गोपचार, फिजिओथेरपी, ध्यान आणि संगणक प्रशिक्षणाच्या माध्यमातून या ज्येष्ठांच्या आयुष्यात नवा उत्साह फुलावा, यासाठी जनसेवा फाउंडेशन निरंतर प्रयत्नशील आहे.

आरोग्यसेवेच्या क्षेत्रातही जनसेवा फाउंडेशनची पावले तितकीच भक्कम आहेत. २४ तास अखंड सुरू असलेले ग्रामीण रुग्णालय, दऱ्याखोऱ्यांत धावणारी मोबाईल मेडिकल व्हॅन आणि दरवर्षी होणाऱ्या ११०० ते १२०० मोफत मोतीबिंदू शस्त्रक्रिया, यातून संस्थेने निरोगी समाजाचा संकल्प प्रत्यक्षात उतरवला आहे. कोरोनाच्या भीषण संकटातही जनसेवा फाउंडेशनने दिलेली अविरत आरोग्यसेवा, राशन किट आणि अन्नवाटप हा माणुसकीचा एक अद्वितीय अध्याय ठरला.

समाजाला आत्मनिर्भर बनवण्यासाठी, जनसेवा कौशल्य विकास केंद्राच्या माध्यमातून ग्रामीण भागातील युवक आणि दिव्यांगांना सन्मानाचा रोजगार मिळवून दिला जात आहे. तर २००७ पासून सुरू असलेल्या समृद्ध वाचनालयात २० हजारांहून अधिक पुस्तकांच्या रूपाने ज्ञानगंगा अखंड वाहत आहे. ज्येष्ठ नागरिकांची अखंड सेवा, तळागाळापर्यंत पोहोचलेली आरोग्यसेवा, गुणवत्तापूर्ण शिक्षण आणि शाश्वत समाजविकास या चतुःसूत्रीवर उभे राहिलेले हे अनुकरणीय सेवाकार्य खरोखरच वंदनीय आहे!

ज्येष्ठ नागरिकांच्या आरोग्य, स्वाभिमान व कल्याणासाठी समर्पित असणाऱ्या “जनसेवा फाउंडेशन” यांना यशवंतराव चव्हाण ज्येष्ठ नागरिक संस्था राज्यस्तरीय कृतज्ञता सन्मान देताना अतिशय आनंद होत आहे.