आदरणीय शरदचंद्रजी पवार साहेब यांच्या देदिप्यमान कारकिर्दीला सलाम करण्यासाठी यशवंतराव चव्हाण सेंटरच्या वतीने 'शरद पवार इन्स्पायर फेलोशिप' १२ डिसेंबर २०२१ या वर्षापासून सुरु करण्यात आली आहे. या अंतर्गत कृषी, साहित्य आणि शिक्षण या क्षेत्रातील गुणवंतांना भविष्यकाळातील नेतृत्वासाठी प्रेरीत केले जाते. फेलोशिपसाठी राज्यभरातून ऑनलाईन अर्ज व प्रस्ताव सादर करण्याबाबत आवाहन करण्यात आले होते. यास राज्यभरातून भरघोस प्रतिसाद लाभला असून शेकडो प्रस्ताव दाखल झाले होते.
या प्रस्तावांवर अतिशय काळजीपूर्वक विचार करुन निवडसमितीने ‘शरद पवार इन्स्पायर फेलोशिप इन ॲग्रीकल्चर’ साठी ६४ तर ‘शरद पवार साहित्य फेलोशिप' साठी १२ अशा एकूण ७६ फेलोंची निवड केली आहे, अशी माहिती चव्हाण सेंटरच्या कार्याध्यक्ष खा. सुप्रिया सुळे यांनी दिली.
कृषी आणि साहित्य फेलोशिपसाठी निवड झालेल्या फेलोंची नावे https://www.sharadpawarfellowship.com/result या संकेतस्थळावर पाहता येतील. तसेच ' शरद पवार इन्स्पायर फेलोशिप इन एज्युकेशन' ची निवड प्रक्रिया अद्याप सुरु असून त्यांची नावे लवकरच जाहीर केली जातील. या उपक्रमाला भरभरुन प्रतिसाद दिल्याबद्दल खा. सुळे यांनी सर्वांचे आभार मानून फेलोशिप मिळालेल्या सर्वांचे अभिनंदन केले.
यावर्षी फेलोशिप न मिळालेल्या उमेदवारांनी निराश न होता; पुढच्या वर्षी पुन्हा प्रयत्न करावा, असे आवाहन खा. सुप्रिया सुळे यांनी केले आहे.