रत्नागिरी, दि.२८ - यशवंतराव चव्हाण सेंटर, जिल्हा केंद्र - रत्नागिरी यांच्या वतीने ज्येष्ठ नागरिकांसाठी कार्यशाळा आयोजित करण्यात आली. या कार्यशाळेत ‘ज्येष्ठ नागरिक कायदा २००७’ या विषयावर ॲड.प्रमोद ढोकळे यांनी तर ‘आनंदी जीवनाची गुरुकिल्ली’ या विषयावर माधवबाग सीएसआर हेड डॉ.मिलिंद सरदार यांनी उपस्थितांना मार्गदर्शन केले.
याप्रसंगी सुमती जांभेकर, फेस्कॉमचे सदस्य उस्मान बांगे, माजी तहसीलदार मारुती अंब्रे, चव्हाण सेंटरच्या ज्येष्ठ नागरिक दिव्यांग विभागाच्या प्रमुख दिपिका शेरखाने, जिल्हा केंद्र रत्नागिरीचे सचिव अभिजीत खानविलकर, सह्याद्री शिक्षण संस्थेचे महाडिक सर उपस्थित होते.
शहरातील शंभरहून अधिक ज्येष्ठ नागरिक या कार्यशाळेसाठी उपस्थित होते. कार्यशाळेतील मुख्य मार्गदर्शनानंतर चर्चासत्र व प्रश्नोत्तरे झाली. उपस्थित ज्येष्ठ नागरिकांनी देखील आपापले अनुभव मांडले. यावेळी वय वर्ष ८२ असलेल्या डॉक्टर साठे यांचा स्विमिंगमध्ये यशस्वी सहभाग नोंदवल्याबद्दल सत्कार करण्यात आला. या कार्यक्रमाचे सूत्र संचालन मनीषा खिल्लारे यांनी केले.